Monday, December 03, 2018

ಪಾತ್ರ ನಿರ್ವಹಣೆ

ಮಗಳು ಹೋಗಿದ್ದಾಳೆ ಅಜ್ಜನ ಮನೆಗೆ

ಅವಳ ಗೊಂಬೆಗಳೀಗ ಬಾಕ್ಸಿನಲಿ ಬಿಕ್ಕುತ್ತಿರಬಹುದೇ?
ಮಿಸ್ ಮಾಡಿಕೊಳ್ಳುತ್ತಿರಬಹುದೇ ಅವಳನ್ನು
ಚಿಂಟು ಟೀವಿಯ ಕರಡಿಗಳು?
ಬೆಲ್ಲದ ಡಬ್ಬಿ ಅಲ್ಲಾಡದ ಸುಳಿವರಿತು
ಮುತ್ತಲು ಧೈರ್ಯ ಮಾಡಿರಬಹುದೇ ಇರುವೆಗಳು?
ಫ್ರಿಜ್ಜಿನಲ್ಲಿನ ದಾಳಿಂಬೆಯೊಳಗಿನ ಕಾಳುಗಳು
ಕೆಂಪಗೆ ಹಲ್ಲು ಗಿಂಜುತ್ತಿರಬಹುದೇ?
ಹರಿಯದೇ ಉಳಿದ ಇಂದಿನ ನ್ಯೂಸ್‌ಪೇಪರು
ತನ್ನೊಳಗಿನ ಸುದ್ದಿಗಳ ತಾನೇ ಓದುತ್ತಿರಬಹುದೇ?
ಮೌನ ಬೇಸರ ಬಂದು ಆಕಳಿಸುತ್ತಿರಬಹುದೇ
ಚೀಂವ್‌ಚೀಂವ್ ಚಪ್ಪಲಿಯೊಳಗಿನ ಪುಟ್ಟ ಪೀಪಿ?

ಎಂದೆಲ್ಲ ಅನಿಸಿ ಈ ನಡುರಾತ್ರಿ ಚಡಪಡಿಸಿಹೋಗಿ
ಅವಳ ಆಟಿಕೆಗಳನೆಲ್ಲ ಹರವಿ
ಟೀವಿ ಹಚ್ಚಿ ಕಾರ್ಟೂನಿಗೆ ಟ್ಯೂನು ಮಾಡಿ
ಬೆಲ್ಲದ ಡಬ್ಬಿ ಕೆಳಗಿಳಿಸಿ ದಾಳಿಂಬೆ ಬಿಡಿಸಿ
ಪೇಪರು ಹರಿದು ಚೂರ್ಚೂರು ಮಾಡಿ
ಚಪ್ಪಲಿಯ ಕೈಯಿಂದ ಒತ್ತಿ ಶಬ್ದ ಬರಿಸಿ

ಏನೆಲ್ಲ ಮಾಡಿ ಅವಕ್ಕೆ ಸಮಾಧಾನ ಮಾಡಿ
ನಾನು ಸಮಾಧಾನಗೊಳ್ಳುವ ಸಲುವಾಗಿ

ಆದರೆ ಅವಂದವು:
ನಮಗೆ ಪುಟ್ಪುಟ್ಟ ಬೆರಳುಗಳು ಬೇಕು
ಮೃದುಪಾದ ಬೇಕು
ಮುದ್ದುಮಾತು ಬೇಕು
ಸಣ್ಣ ಮುಷ್ಠಿಯಲಿ ಬರಗಿ ತಿನ್ನಬೇಕು
ಬೆರಗಲಿ ನೋಡಬೇಕು ನಮ್ಮನು ನಿಜಜೀವಿಗಳೆಂದು ಬಗೆದು

ನಾನು ಮಗಳಾಗಲಾಗದೆ ಸೋತು
ಈ ರಾತ್ರಿ ಜಾಗರ.