Wednesday, January 17, 2007

ಒಳ್ಳೆಯದೇ ಆಯಿತು

ಸಿಗುವುದಿಲ್ಲ ನೀನೀಗ ಆಗಿನಂತೆ-
ಕಾಲೇಜಿನ ಕಾರಿಡಾರಿನಲ್ಲಿ ಒಂಟಿ
ಸಾಲು ನೀಲಗಿರಿ ಮರಗಳ ನೆರಳಲ್ಲಿ ನನಗಂಟಿ
ಜೋರು ಮಳೆಯ ದಿನ ಸೇರಿಕೊಂಡಂತೆ ಬಂದು ನನ್ನ ಛತ್ರಿಯಲ್ಲಿ

ಸಿಗುತ್ತೀ ನೀನೀಗ-
ನಾಲ್ಕು ರಸ್ತೆ ಸೇರುವ ಗಡಿಯಾರ ಗೋಪುರದ ಬಳಿ
ವಿಧಾನಸೌಧದೆದುರಿನ ಜನ ಜಂಗುಳಿಯಲ್ಲಿ
ಪಿವಿಆರ್ ಥೇಟರಿನ ಟಿಕೇಟ್ ಕ್ಯೂನಲ್ಲಿ

ಒಳ್ಳೆಯದೇ ಆಯಿತು ನನಗೆ-
ನೀನು ಭಯಗ್ರಸ್ಥ ಕಣ್ಣುಗಳಲ್ಲಿ ನನ್ನನ್ನು ನೋಡುತ್ತಿರುವಾಗ
ಜೊತೆಯಲ್ಲಿ ನಿಂತ ನಿನ್ನ ಹೊಸ ಗೆಳೆಯ
ಅನುಮಾನದ ಕಣ್ಣುಗಳಲ್ಲಿ ನಿನ್ನನ್ನೇ ನೋಡುತ್ತಿರುವಾಗ

ತಪ್ಪಿಸಬಹುದು ನಾನು ನನ್ನ ಕಣ್ಣ-
ಗೋಪುರದ ದೊಡ್ಡ ಗಡಿಯಾರದ ಮುಳ್ಳನ್ನು ನೋಡುತ್ತಾ
ವಿಧಾನಸೌಧದ ಮೇಲಿನ ಸಿಂಹ ಪುತ್ಥಳಿಯನ್ನು ನೋಡುತ್ತಾ
ಪಿವಿಆರಿನ ಚಲಿಸುತ್ತಿರುವ ಎಸ್ಕಲೇಟರನ್ನು ನೋಡುತ್ತಾ.

(೨೭.೦೪.೨೦೦೬)

7 comments:

ಶ್ರೀನಿಧಿ.ಡಿ.ಎಸ್ said...

ಚೆನ್ನಾಗಿದೆ ಕಣಯ್ಯ!

Shiv said...

ಇದೇಕೋ ನಿಮ್ಮ ಆ 'ಆಟೋಗ್ರಾಪ್' ಹುಡುಗಿಯ ಮುಂದುವರಿದ ಕತೆ ಅನಿಸುತ್ತೆ ಅಲ್ವಾ !

>ಜೊತೆಯಲ್ಲಿ ನಿಂತ ನಿನ್ನ ಹೊಸ ಗೆಳೆಯ
??

Sushrutha Dodderi said...

@ ಶ್ರೀನಿಧಿ...

ಧನ್ಯವಾದಗಳು.

Sushrutha Dodderi said...

@ Shiv

ಶಿವು, ಒಟ್ನಲ್ಲಿ ಆಟೋಗ್ರಾಫ್ ಹುಡುಗಿಯನ್ನು ನಂಗೆ ಮರೆಯಲಿಕ್ಕೆ ಬಿಡಲ್ಲ ನೀವು. :) ಇದು ಅವಳಲ್ಲ ಕಣ್ರೀ, ಮತ್ತೊಬ್ಳು ;)

ಸಿಂಧು sindhu said...

ಸಿಕ್ಕಿದರೂ, ಸಿಗದಿದ್ದರೂ...
ನೆನಪುಗಳಲ್ಲಿ ಬಸಿದು ಬಂದದ್ದು
ಮಧುರವಾದ ಸಿಕ್ಕು...

ಅವಳೇನಾದ್ರೂ ನಿನ್ನೆ ಸಂಜೆ ಸಿಗ್ತೀನಿ ಅಂತ ಹೇಳಿ, ಸಿಗದೆ ಇದ್ದಿದ್ರೆ ಮಾತ್ರ ಸಿಕ್ಕಿಬೀಳುತ್ತಿದ್ದಳು ನಿನ್ನ ಸಿಟ್ಟಿನ ಬಲೆಯಲ್ಲಿ ಅಲ್ವಾ?

ನೆನಪಾಗಿ ಉಳಿದಾಗ ಮಾತ್ರ ನೋವೂ ಮಧುರವಾಗತ್ತೇನೋ ?!

-ಅಕ್ಕ

ಸಿಂಧು sindhu said...

ಸು, ಕವನ ಚೆನ್ನಾಗಿದೆ. ಇಷ್ಟವಾಯಿತು. Thanks..

Sushrutha Dodderi said...

@ ಸಿಂಧು

ಸಿಕ್ಕಿದರೂ, ಸಿಗದಿದ್ದರೂ...
ನೆನಪುಗಳಲ್ಲಿ ಬಸಿದು ಬಂದದ್ದು
ಮಧುರವಾದ ಸಿಕ್ಕು...


-ಸಾಲುಗಳಿಗಾಗಿ ಲಾಟ್ಸಾಫ್ ಧನ್ಯವಾದಗಳು. ಪ್ರತಿಕ್ರಿಯೆಗೂ.